🔱 പണ്ടാരപ്പറമ്പിൽ ഭദ്രകാളി വിഷ്ണുമായ ക്ഷേത്രം

1975 വര്ഷത്തോട് കൂടി പണ്ടാരപ്പറമ്പിൽ ശ്രീ ഭദ്രകാളി വിഷ്ണുമായ ക്ഷേത്രം കോതകുളം ബീച്ച് റോഡിലെ ഇപ്പോഴത്തെ സ്ഥലത്തേക്ക് സ്ഥാപിതമായി. 3 വർഷത്തോളം മുല്ലത്തറയിൽ അടിച്ചു തെളിയും തിരിവെപ്പും മാത്രമായിരുന്നു നടത്തി പോന്നിരുന്നത് .

1978 മീന മാസത്തിലെ രോഹിണി നാളിൽ ശിലാപ്രതിഷ്ഠ നടത്തുകയും തുടർന്ന് അമ്പലത്തിന്റെ നടത്തിപ്പും നിത്യകർമ്മങ്ങളും ചെയ്തു വന്നിരുന്നത് പണ്ടാരപ്പറമ്പിൽ രാമകൃഷ്ണൻ അവർകളുടെ നേതൃത്വത്തിൽ വേലപ്പൻ, ചന്ദ്രൻ എന്നിവരായിരുന്നു.അദ്ദേഹം സംഭാവന ചെയ്ത നാല് സെന്റ് സ്ഥലത്താണ് ഇപ്പോൾ അമ്പലം സ്ഥിതി ചെയ്യുന്നത്.

1993 ഇൽ മീന മാസത്തിലെ ഉത്രാടം നാളിൽ പുനഃ പ്രതിഷ്ഠ നടത്തി നിത്യ പൂജാക്രമത്തിലേക്ക് മാറുകയും വർഷം തോറും പാട്ടും ഉത്സവാദികർമ്മങ്ങളും ചെയ്തു വന്നിരുന്നു. തുടർന്ന് 3 സെന്റ്‌ സ്ഥലം കൂടി ഏറ്റെടുത്തു ഊട്ടുപുര, ചുറ്റുമതിൽ, കിണർ എന്നിവ നിർമ്മിച്ച് ക്ഷേത്രം വികസിപ്പിക്കുകയും തുടർന്ന് 2012 മീന മാസത്തിലെ ഉത്രാടം നാളിൽ ശ്രീ ഭദ്രകാളി വിഷ്ണുമായ അമ്പലങ്ങൾ പുനർനിർമ്മാണം നടത്തുകയും രൂപ പ്രതിഷ്ഠ നടത്തുകയും ആന എഴുന്നള്ളിപ്പോടു കൂടിയ ഉത്സവം നടത്തുകയും ചെയ്തു. തുടർന്ന് തോറ്റം പാട്ടോടു കൂടിയ ഉത്സവം നിലനിർത്തി പോരുന്നു.

വലപ്പാട് ബീച്ചിലെ തറവാട്ടിൽ നിന്നും കാരണവന്മാരായ മാമാ ചക്കി ദമ്പതികൾ ഗോവിന്ദൻ, കല്യാണി, പാറുക്കുട്ടി എന്നിവർ കോതകുളം ബീച്ചിലേക്കും കൃഷ്ണൻ കാളിക്കുട്ടി, നാരായൺ സരോജിനി ദമ്പതികൾ തിരുപഴഞ്ചേരി പരിസരത്തേക്കും പാറുക്കുട്ടി കുറുമ്പക്കുട്ടി ദമ്പതികൾ പയച്ചോട് ഭാഗത്തേക്കും മാറി താമസിച്ചപ്പോഴാണ് തറവാട്ടമ്പലത്തേയും മാറ്റി സ്ഥാപിച്ചത്. തുടർന്ന് ക്ഷേത്രപരിപാലനം നടത്തി പോന്നിരുന്നത് പിൻതലമുറക്കാരായ പണ്ടാരപ്പറമ്പിൽ കുമാരൻ,വേലപ്പൻ, രാമകൃഷ്ണൻ, ചന്ദ്രൻ, രാഘവൻ, സത്യൻ, ധർമരാജൻ, വിദ്യാസാഗർ, തിലകൻ, ശശിധരൻ, ഗോപാലകൃഷ്ണൻ, സുരേഷ്, പ്രദീപ്, സുധീർ എന്നിവരുടെ നേതൃത്വത്തിൽ ആയിരുന്നു.

🌼 ഉപസംഹാരവും സന്ദേശവും

ഭദ്രകാളി എന്നത് വെറും ഒരു ദേവീരൂപമല്ല. അതാണ് ശക്തിയുടെ, ധൈര്യത്തിന്റെ, നീതിന്യായത്തിന്റെ, രക്ഷയുടെ പ്രതീകം. ഭദ്രമായ കാലത്തെ ദാനം ചെയ്യുന്നവളാണ് ഭദ്രകാളി. പുരാണങ്ങളിൽ കണ്ടവണ്ണം, അന്യായത്തിനെതിരെ അടഞ്ഞുനിൽക്കുന്നവളും, ഭക്തർക്കായി എപ്പോഴും സമീപം വസിക്കുന്നവളും അവളാണ്.

ഭദ്രകാളിയുടെ മഹത്വം പാരമ്പര്യമായി കുട്ടികളിലേക്കും വരാനിരിക്കുന്ന തലമുറയിലേക്കും എത്തിക്കേണ്ടത് നമ്മുടെ ബാധ്യതയാണ്. അവൾക്ക് സമർപ്പിച്ച ക്ഷേത്രങ്ങളിലെയും പാരമ്പര്യങ്ങളിലെയും ആത്മാവ് നിലനിർത്തുന്നതും, ഭക്തിയിൽ വളർന്നും, വിശ്വാസത്തിൽ ഉറപ്പോടെ നിലകൊള്ളുന്നതും ആയിരിക്കട്ടെ നമ്മുടേയും നമ്മുടെ മക്കളുടേയും ദൗത്യമായി മാറുന്നത്.

🙏 ഭദ്രകാളി നമ്മെ എല്ലാകാലത്തും കാത്തു രക്ഷിക്കട്ടെ.
🔱 ശ്രീ ഭദ്രകാളി അമ്മേ ശരണം! 🔱